Dagur íslenskrar tungu er haldinn hátíðlegur í dag, 16. nóvember, á fæðingardegi Jónasar Hallgrímssonar. Á því undarlega ári 2020 er ekki hægt að halda upp á þennan dag með sprelli í íslenskutímum, skreyta skólann með ljóðum Jónasar eða heiðra hann með sérstakri dagskrá. Eða hvað?

Auðvitað er ýmislegt hægt og við látum ekki deigan síga. Þær Kristín Edda og Rán, íslenskukennarar við FVA hafa útbúið þrælskemmtilegan spurningaleik sem lagður verður fyrir nemendur í dag. Allir nemendur og starfsmenn FVA geta tekið þátt í leiknum með því að smella hér, og slá inn kóðann: 36921656. Engrar innskráningar er þörf og verðlaun í boði!

Þau sem vilja fá sér göngutúr í dag gætu jafnvel gengið í kringum skólanum og rekið augun í ljóð Jónasar í gluggum FVA. Þau sem ekki eiga heimangengt eru hvött til að skoða vefi sem tengjast Degi íslenskrar tungu:

www.jonashallgrimsson.is

Dagur íslenskrar tungu á Facebook

Dagur íslenskrar tungu hjá MMR

Móðurást eftir Jónas Hallgrímsson:

Fýkur yfir hæðir og frostkaldan mel,
í fjallinu dunar, en komið er él,
snjóskýin þjóta svo ótt og ótt;
auganu hverfur um heldimma nótt
vegur á klakanum kalda.

Hvur er in grátna sem gengur um hjarn,
götunnar leitar, og sofandi barn
hylur í faðmi og frostinu ver,
fögur í tárum, en mátturinn þverr -
hún orkar ei áfram að halda.

,,Sonur minn góði! þú sefur í værð,
sérð ei né skilur þá hörmunga stærð
sem að þér ógnar og á dynja fer;
eilífi guðssonur! hjálpaðu mér
saklausa barninu´ að bjarga.

Sonur minn blíðasti! sofðu nú rótt;
sofa vil eg líka þá skelfingar nótt;
sofðu! ég hjúkra og hlífi þér vel;
hjúkrar þér móðir, svo grimmasta él
má ekki fjörinu farga."

Fýkur yfir hæðir og frostkalda leið,
fannburðinn eykur um miðnæturskeið;
sjóskýjabólstrunum blásvörtu frá
beljandi vindur um hauður og lá
í dimmunni þunglega þýtur.

Svo, þegar dagur úr dökkvanum rís,
dauð er hún fundin á kolbláum ís;
snjóhvíta fannblæju lagði´ yfir lík
líknandi vetur - en miskunnarrík
sól móti sveininum lítur.

Því að hann lifir og brosir og býr
bjargandi móður í skjólinu hlýr,
reifaður klæðnaði brúðar - sem bjó
barninu værðir, og lágt undir snjó
fölnuð í frostinu sefur.

Neisti guðs líknsemdar ljómandi skær,
lífinu bestan er unaðinn fær,
móðurást blíðasta! börnunum háð,
blessi þig jafnan og efli þitt ráð
guð, sem að ávöxtinn gefur.

 

 

Please publish modules in offcanvas position.