Þessi síða er sett upp til þess að auðvelda þeim nemendum námið sem stunda bókfærslu utanskóla. (BÓK-103) Hér geta þeir komist í kennsluáætlunina og hér verða nokkrar hagnýtar upplýsingar um grundvallaratriði í bókfærslu. Ég mun nota kennsluumhverfið Blackboard til þess að koma upplýsingum til nemenda og einnig til samskipta. Þar verða einnig settar inn kannanir og úrlausnir á verkefnum í áfanganum.


Hvað er bókfærsla?

Bókfærsla er skipuleg skráning á viðskiptum. Það er mjög mikilvægt að fyrirtæki hafi góða reglu á bókhaldi svo stjórnendur geti áttað sig á stöðu fyrirtækisins, skilar fyrirtækið hagnaði eða stefnir í tap, eru til nægar vörubirgðir o.sv.frv.

Bókhaldsbækur
Það eru tvenns konar bækur notaðar við bókfærslu. Dagbók og Höfuðbók. Í dagbók eru færð dagleg viðskipti fyrirtækisins en í höfuðbókina eru niðurstöður dagbókar flokkaðar eftir reikningum og þar er gerður efnahagsreikningur og rekstrarreikningur sem segja til um stöðu fyrirtækisins á ákveðnum tímapunkti.

Reikningar
Reikningar í bókhaldi eru fyrst og fremst tvíhliða töludálkar. Þessir dálkar eru kallaðir "Debet" og "Kredit". Það er óþarfi að skilja hvað þessi orð þýða. Það sem skiptir máli er að muna að Debet er vinstri dálkurinn og Kredit er hægri dálkurinn. Í grófum dráttum er hægt að segja að Debet-dálkurinn snúist um það sem kemur inn í fyrirtækið en Kredit-dálkurinn um það sem fer út úr fyrirtækinu.

Flokkar reikninga
Reikningar í bókhaldi geta verið ótal margir, það fer allt eftir stærð og umfangi fyrirtækisins. Það þýðir þó ekki það að nemendur þurfi að læra nöfn á öllum þessum reikningum. Það er nóg að skilja tilgang reikninganna. Við skiptum reikningum í ákveðna flokka og þeir eru fjórir.Gjaldareikningar, Tekjureikningar, Eignareikningar og Skuldareikningar. Til þess að ná góðum tökum á bókhaldi er best að átta sig á innihaldi þessarra reikninga. Þetta eru ekki flókin hugtök, það kannast allir við þau úr daglega lífinu. Ef við erum í vinnu þá fáum við kaup sem eru tekjur og svo förum við út í búð og kaupum okkur föt sem eru þá gjöld eða við kaupum tölvu sem verður eign. Kannski getum við ekki borgað alla tölvuna strax og fáum að geyma hluta af verðinu og það er þá skuld. Ef nemendur átta sig á þessum hugtökum þá gengur þetta oftast nær vel.