Síðsumars 1886 tók Thor Jensen við verslunarrekstrinum undir Búðarkletti úr höndum Akra-Jóns.  Þá um haustið eignaðist Akra-Jón verslunarlóðina í Englendingavík og lét hefja þar smíði húsa. Lét hann byggja íbúðarhús áfast verslunarhúsi og pakkhús ofan við verslunarhús Finns sem nefnt hafði verið Tjernihús.  Smiður við verkið hét Ásbjörn Ólafsson frá Akranesi.

Öll þessi hús standa enn, tvö pakkhús undir Miðnesklettum fyrir ofan bryggju sem hlaðin var í tengslum við verslunina og verslunarhúsið sjálft, Sjávarborg (einnig nefnt Sævarborg).  Byggt hefur verið við það hús.  Í vestur enda þess er nú íbúðarhús en austari hlutinn hefur staðið auður síðan verslun var hætt þar síðla árs 1960.  Þó var húsinu haldið við og þar geymdir ýmsir munir í eigu kaupfélagsins allt þar til fyrir um 10 árum.

Árið 1889 hófst svo Bryde-verslun í húsum Akra-Jóns sem seldi verslunina og flutti til Reykjavíkur.