Akra-Jón hét réttu nafni Jón Jónsson, fæddur á Urriðaá í Álftaneshreppi á Mýrum.  Hann var sonur Jóns Sigurðssonar sem kenndur var við Hjörsey þar sem hann bjó lengst af og fyrri konu hans, Guðrúnar Jónsdóttur.  Faðir Guðrúnar var Jón dannebrogsmaður á Álftanesi á Mýrum.

Jón kvæntist árið 1870 Margréti Þorsteinsdóttur frá Hítardal.  Þau hófu búskap á Ökrum á Mýrum en þar lést Margrét af barnsförum sumarið 1871.  Vorið 1872 brá Jón búi og flutti frá Ökrum en var alla tíð kenndur við staðinn og kallaður Akra-Jón.  Seinni kona Jóns var Sigríður Sigurðardóttir frá Haukagili í Hvítársíðu.

Verslunarrekstur hóf Jón fyrstur manna í Borgarnesi vorið 1877. Það sumar hófst bygging verslunarhúss sem stendur enn og er elsta hús Borgarness.  Þar er rekið veitingahúsið Búðarklettur.  Því húsi var mikið breytt árið 1907 er Jón í Bæ og Jón frá Svarfhóli keyptu Suðurnes-verslunina (þá Lange-verslun).  Verslunarhúsin standa á Suðurnesi og dregur kletturinn að baki verslunarhúsunum nafn af búðinni og heitir enn Búðarklettur.  Hann lét reisa Kaupvang, íbúðarhús sem enn stendur, og hófst bygging þess sumarið 1878.

Akra-Jón flutti verslun sína í Englendingavík og byggði þar upp sumarið 1886 og árin þar á eftir.  Þau hús sem hann byggði þar standa líka enn og hýstu verslun KB í rúma fjóra áratugi.  Jón lést í Reykjavík árið 1916.