Borgarnes fékk löggildingu sem verslunarstaður árið 1867.  Verslun á Brákarpolli við Brákarsund hófst þó nokkru áður.  Komu skip á pollinn og lágu þar yfir sumarið, aðallega norsk og ensk skip.  Var varan seld af skipsfjöl eða sölubúð hrúgað upp í landi meðan á viðskiptum stóð en ull, smjör, vaðmál og önnur verslunarvara keypt af íslendingum. 

Sveinbjörn Jakobsen fékk fyrstur manna lóð undir verslun í Borgarnesi sumarið 1867 en Jón Jónsson, Akra-Jón varð fyrstur til að reisa þar verslunarhús og hefja þar verslun sumarið 1877.

Borgfirðingar þurftu að sækja verslun sína vestur á Snæfellsnes eða til Reykjavíkur á dögum dönsku einokunarinnar.  Er henni var aflétt og verslun gefin frjáls (þó bundið við löggilta verslunarstaði og verslunarleyfi) árið 1855 færðist í vöxt að íslendingar reistu verslanir.  Er menn tóku að huga að verslunarstað í Borgarfirði um miðja 19. öld var Kristófer Finnbogason fenginn til að kanna innsiglinguna inn Borgarfjörð og viðlegu á Brákarpolli.  Sigling hans inn fjörð gekk vel og svo mikill skriður var á skipinu þegar siglt var út aftur að teista sem varð fyrir stefni skipsins klofnaði í tvennt og flaut sinn hvor helmingur aftur með skipinu!