Hús var fyrst reist í Borgarnesi svo  vitað sé eftir söguöld, árið 1857.  Fyrir því stóð skoskur maður,  James Ritchie.  Húsið var byggt við Brákarpoll og þar var lax soðinn niður sumarið 1857 á vegum þessa skoska athafnamanns.  Keypti hann lax af bændum í Borgarfirði og hafði til flutninga teinæring sem knúinn var gufuvél. 
Hús þetta stóð þó ekki lengi við Brákarpoll því sumarið eftir, árið 1858, var það flutt að ósum Grímsár þar sem það hélt áfram að þjóna hlutverki sínu sem niðursuðuhús.  Húsið var rifið sumarið 1977.  Myndina hér til hliðar tók Bjarni Bachman af húsinu það sumar. 

Ritchie hætti starfsemi hérlendis árið 1878 en nokkru fyrr eða árið 1876 reis annað hús í Borgarnesi undir Miðnesklettum.  Þar voru á ferðinni enskir menn og hefur víkin fram af þessum stað síðan verið kölluð Englendingavík.  Það hús stóð þó aðeins fá ár við víkina.