Finnur Finnsson keypti verslun Thordals árið 1884 og einnig íbúðarhús sem stóð nokkru ofan við víkina.  Hófst hann þegar handa við að ljúka smíði verslunarhússins sem þá var hálfbyggt.  Finnur hafði starfað við verslun Egils Egilssonar í Reykjavík en átti meðal annars ættir að rekja vestur í Kolbeinsstaðarhrepp.  Kona Finns var systurdóttir Akra-Jóns sem keypti verslunarhúsin í Englendingavík nokkru eftir að Finnur fór úr víkinni. 

Verslunarrekstur Finns varð endaslepptur.  Hann lauk við smíði verslunarhússins sem hýsa hafði átt Thordalsverslun sem aldrei komst á laggirnar.  Af heimildum að dæma virðist sem húsið hafi brunnið til grunna í eldsvoða milli jóla og nýárs árið 1884.  Var byggingu búðarinnar að mestu lokið en eldur kviknaði í hálmi á gólfinu undir kvöld.  Var eldurinn slökktur en gaus upp aftur nokkrum tímum seinna og að þessu sinni voru engir nógu fljótir á vetvang til að forða því að húsið brynni til grunna.  Urðu það því örlög fyrsta verslunarhússins í Englendingavík að verða eldsmatur um það bil sem það var tekið í notkunn. 

Finnur byggði annað hús árið eftir.  Var verslun hans tryggð hjá erlendu tryggingarfélagi og gerði það honum kleift að byggja annað hús sem enn stendur neðst í húsaþyrpingunni í víkinni.  Það er nokkur kaldhæðni að í því húsi kviknaði í upphafi sjöunda áratugarins.  Þá mátti það reyndar muna fífil sinn fegri því þá var rekið þar hænsnabú.  Var mikil tilviljun að tókst að bjarga húsunum í Englendingavík í það sinn og vasklegri framgöngu Björns Guðmundssonar slökkviliðsstjóra og Guðna Haraldssonar að þakka að vel fór.

Örlög Finnsverslunar réðust síðari hluta árs 1885.  Tóku þá að berast kröfur um lögtak vegan ógreiddra skulda og vorið 1886 flutti Finnur með fjölskyldu sína allslaus til Reykjavíkur.  Eignirnar í Englendingavík voru seldar á uppboði í febrúar veturinn áður og keypti Daníel Fjelsted bóndi í Hvítárósi íbúðarhúsið og flutti það heim til sín.  Verslunarhúsið keypti William Tierney, skoskur gyðingur.  Hélt hann einskonar uppboð í húsinu sumarið 1885 en var aldrei með eiginlegan verlsunarrekstur þar.  Var húsið um stund nefnt eftir honum og kallað Tjernihús. 

Virðist sem lítið hafi verið um umsvif eða mannaferðir í víkinni veturinn 1886 en það vor dregur svo enn til tíðinda er Akra-Jón kaupir leifar Finnsverslunar og hefur þar verlsunarrekstur.

Húsin í Englendingavík á dögum Bryde- verslunarinnar. Næst á myndinni er hús frá dögum Finnsverslunar (seinna Tjerni-hús) en hin húsin eru frá verslunartíð Akra-Jóns.

Tjernihús í dag.  Grind hússins er orðin léleg en húsið er enn að mestu í upprunalegu ástandi þó skipt hafi verið um glugga og hurðir.  Hafist verður handa við endurgerð hússins sumarið 2005.