Niels Bryde hafði hagnast á verslun í Vestmannaeyjum fyrir miðja 19. öld.  Sonur hans Johan Peter Thorkelin Bryde var tekinn við verslunarrekstrinum þegar tók að halla undan fæti í verslunarrekstri Akra-Jóns í Englendingavík snemma árs 1889.  Tókust samningar með þeim Jóni og keypti Bryde verslunina og öll hús hans í Englendingavík.  Þar með hófst rekstur Bryde-verslunar í húsum Akra-Jóns, sem flutti til Reykjavíkur.  Þessi brautryðjandi í verslunarrekstri í Borgarnesi hélt áfram kaupmennsku í Reykjavík og rak verslun á Laugarveginum lengst af en hann lést í Reykjavík árið 1916. 

Fyrsti verslunarstjóri Brydeverslunar var Páll Jóhannesson frá Kirkjufelli í Grundarfirði.  Brydeverslun keypti síðan Tjernihús af eiganda þess, John Hermitage sem hafði tekið húsið uppí skuld sem hann átti við Tierney þann skoska.

Gísli Jónsson var verslunarstjóri í Bryde-verslun frá 1911.  Hann keypti síðan verslunina árið 1913 er Bryde-verslun fór á hausinn og rak hana þangað til kaupfélagið keypti verslunina.

Meðal merkismanna sem unnu í verslun Bryde voru þeir Jón Björnson í Bæ og Jón Björnsson frá Svarfhóli.  Þeir voru umsvifamiklir í verslun í Borgarnesi á fyrri hluta 20. aldar.

Húsin í Englendingavík á dögum Bryde- verslunarinnar. 

Húsin skömmu eftir aldamót.  Hér er búið að byggja við íbúðina í enda verslunarhússins.