Samningur um Fjölbrautaskóla Vesturlands

1. gr.

Sveitarfélög þau, sem eru aðilar að samningi þessum, standa í sameiningu ásamt menntamálaráðuneytinu að uppbyggingu Fjölbrautaskóla Vesturlands. Miðstöð skólans er á Akranesi en meginforsenda þessa samning er að kennsla á vegum skólans fari einnig fram á stöðum utan Akraness þegar nemendafjöldi er nægur og aðrar aðstæður fullnægjandi sbr. 3. gr.

Skólinn starfar skv. lögum um framhaldsskóla nr. 80/1996 og reglugerðum settum eftir þeim.

Hlutverk Fjölbrautaskóla Vesturlands er að bjóða upp á fjölbreytt, nám á framhaldsskólastigi, bæði bóklegt og verklegt, efla samstarf í menntamálum á Vesturlandi og jafna þannig aðstöðu íbúanna til framhaldsnáms.

Fjölbrautaskóli Vesturlands er aðili að Símenntunarmiðstöðinni á Vesturlandi og vinnur með henni að fullorðinsfræðslu, námskeiðahaldi og eftirmenntun.

Nánar er kveðið á um hlutverk og rekstur Fjölbrautaskóla Vesturlands í sérstökum samningi milli skólans og menntamálaráðuneytisins.

Skólanefnd tekur ákvörðun um starfrækslu náms á Vesturlandi utan Akraness að fengnu samþykki sveitarstjórnar á viðkomandi stað og að fengnu áliti skólameistara Fjölbrautaskóla Vesturlands.

Skólahald á hverjum tíma skal miða við það skólahúsnæði sem fyrir hendi er, þá kennara sem völ er á, gildandi ákvæði um lágmarksfjölda í námshópum og/eða kennslugreinum og ákvæði um búnað kennsluhúsnæðis.

Skólameistari annast samræmingu og skipulag starfseminnar sem fram fer utan Akraness.

Kostnaður sem af þessari starfsemi leiðir telst hluti af rekstrarkostnaði skólans og greiðist sem slíkur.

4. gr.

Nemendur úr sveitarfélögum sem eiga aðild að þessu samkomulagi skulu eiga forgang að heimavist, verknámsdeildum og öðrum þeim þáttum í starfsemi Fjölbrautaskóla Vesturlands, sem aðgangur er takmarkaður að, svo fremi þeir uppfylli inntökuskilyrði er gilda á hverjum tíma.

5. gr.

Daglegur skólaakstur skal vera milli Borgarness og Akraness. Skólanefnd getur samþykkt að taka upp annan akstur ef hagkvæmt þykir.

Um þátttöku nemenda í skipulögðum skólaakstri fer eftir reglugerð menntamálaráðuneytisins um jöfnun námskostnaðar.

6. gr.

Fulltrúaráð og skólanefnd Fjölbrautaskólans fara með málefni skólans í umboði sveitarfélaga sem að skólanum standa. Skólanefnd starfar skv. ákvæðum í reglugerð um framhaldsskóla. Fulltrúaráð skal vera skólanefnd til ráðuneytis um þjónustu skólans á Vesturlandi og vera tengiliður á milli skólanefndar og sveitarfélaga sem eiga aðild að skólanum.

Fulltrúaráð Fjölbrautaskólans skal skipað 12 fulltrúum og 12 til vara. Kjörtímabil fulltrúa sveitarfélaga í fulltrúaráði er fjögur ár og fylgir kjörtímabili sveitarstjórna. Skipting fulltrúa eftir sveitarfélögum er sem hér segir:

Gerist sveitarfélög utan Vesturlands aðilar að skólanum skal fulltrúaráð ákveða hvernig þau öðlast aðild að ráðinu.

Auk fulltrúa sitja fundi fulltrúaráðs með málfrelsi og tillögurétti aðrir skólanefndarfulltrúar en þeir sem sæti eiga í fulltrúaráðinu, skólameistari, aðstoðarskólameistari og tveir fulltrúar kennara. Ef kennsla fer fram víðar en á Akranesi skal annar fulltrúi kennara starfa við einhvern samstarfsskólanna en hinn við skólann á Akranesi.

Á fyrsta fundi nýkjörins fulltrúaráðs kýs það formann og ritara úr sínum hópi og varaformann og vararitara. Formaður boðar til funda og stýrir þeim, ritari heldur gjörðabók. Fundargerðir fulltrúaráðs skal senda menntamálaráðuneytinu, Samtökum sveitarfélaga á Vesturlandi og sveitarstjórnum. Til aukafundar í fulltrúaráði skal boða þegar skólameistari eða 1/3 fulltrúa óskar þess. Fundi fulltrúaráðs skal boða með dagskrá og teljast þeir þá löglega boðaðir. Halda skal minnst 2 fundi á hverju ári, einn á. hvorri önn.

Verði ágreiningur um afgreiðslu mála í fulltrúaráði skal viðhafa hlutfallslega atkvæðagreiðslu miðað við hlutdeild sveitarfélaga í stofn- og rekstrarkostnaði, enda komi fram ósk a.m.k. eins nefndarmanns um slíka atkvæðagreiðslu. Vægi atkvæða fulltrúa í fulltrúaráði skal þá vera í sama hlutfalli og hlutdeild þess eða þeirra sveitarfélaga, sem þeir eru fulltrúar fyrir í stofn- og rekstrarkostnaði skv. 10. gr. þessa samnings. Þarf þá 2/3 hluta atkvæða til að mál teljist samþykkt.

Í skólanefnd sitja fimm fulltrúar skv. lögum um framhaldsskóla. Þá tvo fulltrúa sem hlutaðeigandi sveitarfélög skulu tilnefna samkvæmt lögunum kýs fulltrúaráð úr sínum hópi.

Hlutverk skólanefndar er að marka áherslur í starfi skólans. Hún starfar í samræmi við lög og reglugerð. Hún gerir m.a. árlega þriggja ára starfs- og fjárhagsáætlun fyrir skólann sem lögð er fyrir menntamálaráðherra. Þessa áætlun skal leggja fyrir fulltrúaráð til umsagnar.

Sveitarfélögin greiða aðeins þann rekstrarkostnað sem fellur til vegna sérstakra verkefna sem fulltrúaráð hefur áður lagt til og sveitarstjórnir samþykkt.

Kostnaður vegna framkvæmda skiptist milli ríkis og sveitarfélaga í þeim hlutföllum sem lög um framhaldsskóla og sérstakir framkvæmdasamningar kveða á um. Þeim hluta stofnkostnaðar og rekstrarkostnaðar sbr. 9. gr., sem til fellur skv. samningi þessum og eigi greiðist úr ríkissjóði eða af öðrum tekjum, skipta sveitarfélögin er að samningnum standa með sér í hlutfalli við íbúafjölda skv. eftirfarandi reglum. Miða skal við íbúatölu sveitarfélaga 1. desember árið áður.

Upp í íbúafjölda á Akranesi skal deilt með 0,83.
Upp í íbúafjölda í Borgarfjarðar- og Mýrasýslna skal deilt með 1,80.
Upp í íbúafjölda sveitarfélaga í Dalasýslu og Snæfells- og Hnappadalssýslu skal deilt með 2,60.

Greiðslur sveitarfélaganna á kostnaðarhlut sínum skulu inntar af hendi samkvæmt samkomulagi sveitarfélaganna og skólans þar um.

Segi sveitarfélag upp aðild sinni að samningnum verður framlag þess vegna framkvæmda ekki endurgreitt nema eignir skólans, sem sveitarfélag hefur veitt framlag til, verði seldar eða teknar til annarra nota en reksturs framhaldsskóla, eða ef ríkið leysir til sín eignarhluta sveitarfélaganna sem að samningi þessum standa. Við endurgreiðslu skal tekið mið af heildarverðmæti viðkomandi eignar og framreiknuðu framlagi sveitarfélags.

Samningur þessi er háður þeim breytingum sem kunna að verða á lagaákvæðum um framhaldsnám. Endurskoða skal samninginn innan fimm ára frá gildistöku hans og hafi skólanefnd forgöngu um það verk. Hægt er að segja samningnum upp um hver áramót með 7 mánaða fyrirvara, þannig að slit viðkomandi sveitarfélags á samningum taki gildi 1. ágúst.

Samningur þessi tekur gildi í dag og tekur þá við af fyrri samningi um Fjölbrautaskóla Vesturlands.

Akranes	5 fulltrúar og 5 til vara
Borgarbyggð	3 fulltrúar og 3 til vara
Dalabyggð	1 fulltrúi og 1 til vara
Eyja- og Miklaholtshreppur	1 fulltrúi og 1 til vara
Hvalfjarðarsveit	1 fulltrúi og 1 til vara
Skorradalshreppur	1 fulltrúi og 1 til vara

Samningur um Fjölbrautaskóla Vesturlands á Akranesi