Könnun á skólareglum og framkvæmd þeirra,
samskiptum innan skólans og líðan nemenda, námsráðagjöf,
umsjón og upplýsingamiðlun, félagslífi og íþróttaiðkun
var lögð fyrir nemendur í umsjónartíma þann
17. nóvember 2004 og könnun á sömu atriðum, að
félagslífi og íþróttaiðkun frátöldum,
var lögð fyrir kennara á almennum kennarafundi 4. nóvember
2004.
Hver kennari var beðinn að svara spurningum um alla þessa þætti nema félagslífið og íþróttirnar. Nemendum var hins vegar skipt af handahófi í fjóra jafnstóra hópa og einn hópur beðinn að svara spurningum um skólareglur og framkvæmd þeirra, annar um samskipti innan skólans og líðan nemenda, þriðji um námsráðagjöf, umsjónartíma og upplýsingamiðlun og sá fjórði um félagslíf. Allir nemendur voru beðnir að svara spurningum um þátttöku sína í skólaíþróttum og annarri líkamsrækt eða þjálfun.
Spurningalistar liggja hér frammi í pdf-skrám og niðurstöður talningar í Excel-skrám. Fjöldi svarenda er tilgreindur innan sviga.
Í samantekt sem hér fer á eftir er tæpt á helstu niðurstöðum.
94% nemenda telja sig vita hvað er leyfilegt og hvað er bannað í skólanum og 93% telja sig vita hvaða reglur gilda um skólasókn og skólasóknareinkunn.
Almennt virðast nemendur og kennarar álíta að stjórnendur framfylgi skólareglum. 88% nemenda eru mjög sammála (31%) eða fremur sammála (57%) því að stjórnendur geri það sem þarf til að framfylgja skólareglum. Svör kennara við þessari spurningu eru svipuð þar sem 81% eru mjög sammála (22%) eða fremur sammála (59%) því að stjórnendur geri það sem þarf til að framfylgja skólareglum.
99% nemenda telja sig haga sér vel í skólanum og 87% þeirra telja að nemendur hagi sér almennt vel. Mat kennara er svipað þar sem 97% þeirra er mjög sammála (13%) eða fremur sammála (84%) því að nemendur hagi sér almennt og yfirleitt vel í skólanum.
Þessi svör benda til að agaleysi og slæm hegðun séu ekki vandamál í skólanum. Þó er áhyggjuefni að 17% nemenda eru fremur ósammála (14%) eða mjög ósammála (3%) því að kennurum takist vel að halda uppi aga og tryggja vinnufrið í kennslustundum. Hins vegar telja allir kennarar sem tóku þátt í könnuninni að þeim sjálfum takist að halda uppi aga og tryggja vinnufrið.
Af þeim atriðum sem spurt var um í sambandi við skólareglur og framkvæmd þeirra var helst óánægja með að reglur um skólasókn séu ekki nógu sanngjarnar. 28% kennara eru fremur ósammála (22%) eða mjög ósammála (6%) fullyrðingu um að þær séu sanngjarnar. Svör nemenda við sömu spurningu eru enn neikvæðari þar sem 41% eru fremur (19%) eða mjög (22%) ósammála sömu fullyrðingu.
Um 97% nemenda telja sig koma vel fram við starfsfólk og skólafélaga og 88% álíta kennara og annað starfsfólk koma vel fram við sig. Svör kennara við spurningum um þessi efni eru einnig jákvæð því flestir (94%) þeirra eru sammála því að samskipti fólks í skólanum séu jákvæð og þægileg og allir kennarar telja að samkennarar og starfsmenn komi vel fram við sig.
91% nemenda og 100% kennara eru sammála því að samskipti í skólanum einkennist af kurteisi og tillitssemi. 98% kennara álíta að nemendum líði almennt vel í skólanum og 92% nemenda og 98% kennara segja að sér líði oftast vel í skólanum.
Tölurnar sem nefndar eru hér að ofan virðast benda til að samskipti fólks í skólanum séu að jafnaði í góðu lagi. Svör við öðrum spurningum vekja þó efasemdir um það.
31% nemenda eru fremur sammála (25%) eða mjög sammála (6%) því að sumir nemendur séu lagðir í einelti af skólafélögum og 38% nemenda eru fremur sammála (27%) eða mjög sammála (11%) því að sumir nemendur séu lagðir í einelti af kennurum eða öðru starfsfólki.
Svör kennara við spurningum um einelti eru svipuð svörum nemenda 40% þeirra eru fremur sammála (31%) eða mjög sammála (9%) því að sumir nemendur séu lagði í einelti af skólafélögum og 34% þeirra er fremur sammála (25%) eða mjög sammála (9%) því að sumir nemendur séu lagðir í einelti af kennurum eða öðru starfsfólki og 20% kennara eru fremur sammála (17%) eða mjög sammála (3%) því að sumir starfsmenn skólans séu lagðir í einelti af vinnufélögum.
83% kennara og 84% nemenda telja gagnlegt sé að hafa umsjónartíma einu sinni í viku. Álíka hlutfall (85% kennara og 83% nemenda) álítur að upplýsingamiðlun í umsjónartímum sé mikilvæg.
Þorri nemenda, eða 80%, er fremur (54%) eða mjög (26%) sammála því að gott sé að geta leitað til umsjónarkennara og 58% segjast hafa rætt við umsjónarkennara sinn einu sinni eða oftar á önninni.
Í svörum umsjónarkennara kemur fram að 57% þeirra þekkja alla umsjónarnemendur sína með nafni og 22% þekkja þá næstum alla með nafni.
Þegar nemendur voru spurðir hvert þeir sæki upplýsingar sem þeir nota til að velja áfanga og skipuleggja nám sitt merktu flestir við skólavefinn (46%), næstflestir styðjast við blöð sem dreift er í umsjónartímum (42%), þá koma námsráðgjafar (34%) og aðrir nemendur (26%). Aðeins 6% sögðust leita til deildarstjóra.
21% umsjónarkennara eru annað hvort fremur ósammála (17%) eða mjög ósammála (4%) fullyrðingu um að þeir fái allar upplýsingar sem þeir þurfa til að geta leiðbeint umsjónarnemendum sínum við að velja áfanga og skipuleggja nám sitt.
14% nemenda eru annað hvort fremur ósammála (12%) eða mjög ósammála (2%) fullyrðingu um að þeir fái allar upplýsingar sem þeir þurfa til að velja áfanga og skipuleggja nám sitt.
Þessar tölur benda til að þörf sé að bæta upplýsingamiðlun til nemenda í tengslum við námsáætlanagerð og val. Einkum virðist þörf á að bæta upplýsingamiðlun til yngri nemenda því um 20% þeirra sem fæddir eru 1997 og 1988 (þ.e. tveggja yngstu árganganna) telja að þeir fái ekki nægar upplýsingar til að velja áfanga og skipuleggja nám sitt.
Í svörum kennara og nemenda kemur fram almenn ánægja með námsráðgjöf í skólanum. Allir kennarar sem svara spurningum um efnið segjast annað hvort fremur sammála (47%) eða mjög sammála (50%) því að þeir séu ánægðir með samskipti sín við námsráðgjafa. Um 92% nemenda eru annað hvort mjög sammála (49%) eða fremur sammála (43%) sömu fullyrðingu. Þegar spurt var hvort nemendur sem leita til námsráðgjafa fái þá aðstoð sem þeir þurfa voru sömuleiðis allir kennarar sem svöruðu sammála því. 96% nemenda svöruðu sömu spurningu með því að segjast mjög (57%) eða fremur sammála (39%).
Um 20% nemenda segjast stundum (15%) eða oft (5%) hafa þurft að bíða of lengi eftir að ná sambandi við námsráðgjafa. Þetta er eina atriðið í sambandi við námsráðgjöfina þar sem neikvæð svör fengust frá meira en 7% nemenda.
Námsráðgjöfin er meira notuð af stúlkum en af piltum en 33% pilta og 19% stúlkna höfðu aldrei leitað til námsráðgjafa.
Um 95% af yngstu tveim árgöngunum (1987 og 1988) er í nemendafélaginu en aðeins 58% þeirra sem eru fæddir 1986 eða fyrr.
Nokkuð margir vita ekki hverjir gegna trúnaðarstörfum fyrir nemendafélagið, sérstaklega vantar á að yngstu nemendurnir viti þetta. Til dæmis vita aðeins 37% þeirra sem eru fæddir 1988 hver er formaður nemendafélagsins og aðeins 16% um alla stjórnarmenn. Þetta er heldur betra hjá 1987 árganginum þar sem 70% vita hver er formaður og 57% um alla stjórnarmenn.
Viðhorf nemenda til nemendafélagsins og félagslífsins er almennt jákvætt. Til dæmis merkja 86% við mjög sammála (27%) eða fremur sammála (59%) þar sem spurt er hvort svarandi sé ánægður með nemendafélagið og störf þess.
Ríflegur meirihluti eða 68% álítur þörf fyrir meira félagslíf um helgar. Heldur færri eða 62% telja þörf fyrir meira félagslíf í miðri viku.
63% nemenda segist ekki taka þátt í neinu félagsstarfi utan skólans. Af þeim sem stunda félagsstarf utan skólans taka flestir (eða um 20% af öllum nemendum) þátt í starfi íþróttafélags og um 12% taka þátt í leiklistar- eða tónlistarstarfi utan skólans.
25% nemenda segjast gjarna vilja starfa meira fyrir nemendafélagið en þeir hafa gert. Meðal nemenda sem fæddir eru 1987 og 1988 er þetta hlutfall talsvert hærra eða 34% af árgangi. 1988 og 39% af árgangi 1987. Athygli vekur að enginn nemandi sem fæddur er 1988 segist hafa verið beðinn að starfa fyrir félagið. Þetta vekur spurningar um hvort ekki þurfi að gera eitthvað til að virkja nýnema til þátttöku í starfi nemendafélagsins.
21% telja sig ekki fá næg tækifæri til að taka þátt í starfi nemendafélagsins. Áberandi er að 36% þeirra sem nota skólabílinn telja sig ekki hafa næg tækifæri til að taka þátt í starfi félagsins.
Svör nemenda við spurningum um þátttöku í skólaíþróttum benda til að um 90% tveggja yngstu árganganna (þeirra sem fæddir eru 1987 og 1988) taki þátt í skólaíþróttum en aðeins um 44% þeirra sem eldri eru.
Talsvert hærra hlutfall pilta (67%) en stúlkna (58%) eru í íþróttaáföngum. Einnig er talsvert meira um að piltar æfi með íþróttafélögum en stúlkur. Um 29% pilta kveðst æfa með félagi þrisvar í viku eða oftar en aðeins um 19% stúlkna. Svipað er uppi á teningnum þegar spurt er um aðra líkamsrækt en íþróttaáfanga í skólanum eða æfingar með íþróttafélagi. Um 30% pilta segjast stunda hana þrisvar í viku eða oftar og um 23% stúlkna.
Um 15% af öllum nemendahópnum kveðst ekki stunda neina líkamsrækt. Þetta eru um 20% af stúlkunum og um 11% af piltunum. Þetta hreyfingarleysi er algengara hjá nemendum sem fæddir eru 1986 eða fyrr heldur en hjá tveim yngstu árgöngunum en um 24% þeirra eldri og um 4% þeirra yngri segjast ekki stunda líkamsrækt af neinu tagi.