Skýrsla um mat á
stöðu, aðbúnaði, kennslu, námsmati og árangri
í einstökum deildum og fögum

Á vorönn 2005 var eftirfarandi spurningalisti lagður fyrir allar deildir skólans. Fagkennarahópar í íslensku, stærðfræði, tungumálum, samfélagsgreinum, raungreinum, viðskipta- og tölvugreinum, bygginga- og mannvirkjagreinum, málmiðngreinum og rafiðngreinum héldu fundi, ræddu spurningarnar og skiluðu skriflegum svörum til aðstoðarskólameistara. Íþróttadeildin skilað ekki svörum vegna þess að deildarstjóri, sem einnig er annar tveggja íþróttakennara í fullu starfi við skólann, var fjarverandi stóran hluta annarinnar og kennslunni sinnt af forfallakennurum.

Spurningalisti vegna mats á stöðu, aðbúnaði, kennslu, námsmati og árangri í einstökum deildum og fögum

1.       Staða námsgreina í deildinni. a.     Hvernig gengur að fá nemendur - hvernig er aðsókn að greinunum? b.     Hvernig er undirbúningi nemenda háttað? c.     Hvernig gengur að vekja áhuga nemenda? d.     Vinnur kennarahópurinn að því að auka áhuga nemenda á námsgreinum í deildinni? e.     Er nægilegt framboð af áföngum við skólann? f.      Er nægilegt framboð á viðbótar- og endurmenntun fyrir kennara og hversu duglegir eru þeir að sækja námskeið sem bjóðast? 2.     Aðbúnaður. a.     Er húsnæði (kennslustofur, verkstæði, geymslur ...) nógu gott? b.     Er tækjakostur nógu góður? c.     Er nóg til af námsgögnum? d.     Þjónar bókasafnið greinunum nógu vel? 3.     Kennsla. a.     Er auðvelt að manna alla áfanga með kennurum sem hafa næga þekkingu og hæfni? b.     Er þörf á að auka eða bæta samstarf eða samráð kennara? c.     Vinna kennarar í deildinni þróunarstarf (t.d. við mótun nýrra áfanga eða nýs námsefnis)? d.     Fá allir kennarar tækifæri til að nýta og þroska hæfileika sína? e.     Er kennslutími fullnýttur (þ.e. er unnið í hverjum tíma þar til hringt er út) eða er hægt að koma fleiri verkefnum, meiri þjálfun eða meira efni fyrir innan kennslutímans? 4.     Námsmat og námsárangur. a.     Eru próf og matsaðferðir metnar eða skoðaðar með skipulegum hætti (t.d. með samanburði við aðra skóla)? b.     Eru kröfur til nemenda (vinnuálag, þyngd verkefna og prófa) hæfilegar? c.     Fer kennarahópurinn skipulega yfir niðurstöður prófa og árangur nemenda? d.     Hvernig bregst deildin við ef árangur er ekki nógu góður? 5.     Kvartanir. a.     Berast kvartanir um starf í deildinni og ef svo er frá hverjum? b.     Hvernig er brugðist við kvörtunum? 6.     Er annað sem deildin vill taka fram og varðar gæði þeirra starfa sem kennarar innan hennar vinna?

Svör deilda hafa verið yfirfarin af skólameistara og aðstoðarskólameistara og á næstu önn munu þeir ræða þau á fagkennarafundum í öllum deildum skólans.

Svörin eru ekki birt hér heldur aðeins nokkrir punktar sem vöktu sérstaka athygli eða kalla á aðgerðir. Þar sem lýst er fyrirhuguðum aðgerðum eða viðbrögðum stjórnenda við niðurstöðum deildanna er textinn undirstrikaður.

1. Varðandi stöðu námsgreina:

Stærðfræðideild bendir á að ekki sé aðsókn að áföngunum STÆ3636 og STÆ4636 sem henta nemendum á mála- of félagsfræðabrautum. Þessir áfangar falla iðulega niður og því læra margir nem­endur á þessum brautum minni stærðfræði en æskilegt er. Í raungreinadeild var einnig talað um litla aðsókn að framhaldsáföngum í eðlisfræði og fleiri greinum og í viðskiptadeild komu fram svipaðar áhyggjur vegna lítillar aðsóknar. Í samfélagsgreinadeild var rætt um að kjörsviðsfyrirkomulagið gefi nemendum tilefni til að leita að þægilegustu áföngunum. Í þessu sambandi var m.a. spurt um hvort það geti verið eðlilegt að valáfangar handa eldri nemendum séu auðveldari en grunnáfangar.

Þessar áhyggjur sem fram komu í raungreinadeild, samfélagsgreinadeild og stærðfræðideild gefa tilefni til að endurskoða framboð kjörsviðsáfanga og kanna leiðir til úrbóta m.a. með markvissari ráðgjöf um val kjörsviðsáfanga á bóknámsbrautum. Í ráði er að í 5. útgáfu skólanámskrár verði  skilgreindir heildstæðir pakkar kjörsviðsáfanga á félagsfræða- og náttúrufræðibraut.

Máladeild bendir á að efri áfangar (þ.e. 503 og 603) í þýsku og frönsku séu sjaldan í boði og þegar þeir bjóðast séu þeir oftast of fámennir til að vera kenndir svo nemendur neyðist til að taka þá í P sem getur ekki komið í staðinn fyrir kennslustundir. Algengt er að nemendur á málabraut byrji strax á fyrstu önn sinni í þriðja máli og hafi því lokið fjórum áföngum eftir 2 ár, en þeir hafa ekki heimild til að taka P-áfanga fyrr en á útskriftarönn og myndast því „stórt gat“ í ferlinum sem er óæskilegt. Um þetta vandamál þurfa stjórnendur skólans að ræða við kennara í tungumálum og leita lausna á því.

Það er áhyggjuefni að kennarar í íslensku, málmiðngreinum, raungreinum og stærðfræði telja framboð á endurmenntun fyrir kennara of lítið og kennarar í tungumálum og viðskiptagreinum tala um að það hafi minnkað undanfarin ár. Kennarar í samfélagsgreinum telja hins vegar að framboð á endurmenntun sé talsvert.

 

2.  Varðandi aðbúnað:

Almenn ánægja er með nýju kennslustofurnar D101 til D105. Sama verður ekki sagt um allar eldri kennslustofur. Máladeild kvartar undan slæmum hljómburði í C103 og C107 og ónýtri töflu í B104.

Stærðfræðideild minnir á að það vantar stærðfræðistofur þar sem eru stórar töflur sem hægt er að færa upp og niður og töflur með hnitakerfi. Einnig nefna stærðfræðikennarar þörf á „tölvutöflum“. Kennarar í samfélagsgreinadeild og viðskiptadeild nefna einnig mikilvægi þess að hvert fag hafi sína stofu.

Í raungreinadeild var talað um afleita aðstöðu til verklegrar kennslu en það stendur allt til bóta með nýju kennsluhúsnæði. Deildin minnir á mikilvægi þess að sjúkraliðanámið fái fastan samastað og stingur upp á stofum B201 og B202.

Í málmiðnadeild var rætt um að tækjakostur sé misgóður og að stofa M105 sé ekki nógu góð. Í byggingagreinum var talað um að verkstæðið við Vesturgötu sé gamalt og of langt frá skólanum. Í rafiðnadeild var talað um skort á geymslurými og of litlar kennslustofur.

Í nokkrum deildum nefna kennarar að þörf sé að búnaði (hátölurum, tengibúnaði) til að spila hljóð beint úr tölvuskrám og á að hafa skjávarpa í stofum. Íslenskukennarar nefna að myndvarpar í skólanum séu sumir orðnir lélegir og tungumálakennarar að viðhald hljómtækja sé ekki nægilegt.

Allt það sem að ofan segir um kennslurými og búnað þarf að hafa í huga þegar kennslustofur á efri hæð nýbyggingar verða teknar í notkun, nýting eldra húsnæðis endurskipulögð af því tilefni og ákvarðanir teknar um næstu skref í byggingamálum.

Meðal raungreinakennara var rætt um skort á nógu góðu námsefni á íslensku og í viðskiptadeild um að til mætti vera meira af nýrri og betri námsgögnum. Skortur á námsefni var líka til umræðu í meðal kennara í bygginga- og mannvirkjagreinum, í málmiðnadeild og rafiðnadeild.

Almenn ánægja er með þjónustu bókasafns. Þó bentu tugumálakennarar á að fleiri íslensk-þýskar orðabækur þyrftu að vera til á safninu og einnig að bæta þyrfti danskan bókakost bókasafnsins og koma upp kvikmyndakosti. Þessi atriði verða kynnt fyrir forstöðumanni skólabókasafns.

 

3.  Varðandi kennslu

Svör kennara benda ekki til að það sé neitt vandamál að manna alla áfanga hæfum kennurum með næga sérþekkingu.

Spurningu um hvort kennarar fái tækifæri til að nýta og þroska hæfileika sína var svarað jákvætt af kennurum í bygginga- og mannvirkjagreinum, íslenskudeild, máladeild, málmiðnadeild, rafiðnadeild, raungreina­deild og viðskiptadeild. Svör stærðfræðideildar og samfélagsgreinadeildar voru beggja blands.

Þar sem spurt var um þróunarstarf bentu kennarar í samfélagsgreinum á að ástæða geti verið til að kynna þróunarstarf sem fram fer við skólann á kennarafundum og að vel megi hugsa sér að einn kennarafundur á önn verði helgaður kynningum deilda á eigin þróunarstarfi. Þessi ábending verður tekin til athugunar.

 

4.  Varðandi námsmat og námsárangur

Kennarar í málmiðnadeild telja að kröfur við deildina séu með meira móti samanborið við aðra skóla og fyrir vikið falli fáir nemendur héðan á sveinsprófum.

Vinnuálag á nemendur og kröfur til þeirra eru síst of miklar að mati kennara í íslenskudeild, máladeild, raungreinadeild og stærðfræðideild. Í samfélagsgreinadeild komu fram áhyggjur af að nemendur sinni náminu ekki sem skyldi vegna mikillar vinnu með skóla. Meðal kennara í bygginga- og mannvirkjagreinum var talað um að finna þurfi hvetjandi leiðir til að fá nemendur til að leggja meira á sig og í rafiðnadeild um skort á heimanámi. Þetta vekur spurningar um hvort það þurfi einhvers konar sameigin­legt átak til að þrýsta á nemendur að læra meira heima og leggja sig betur fram. Um þetta þurfa stjórnendur skólans að ræða við kennara í öllum deildum.

Í þessu sambandi er vert að rifja upp að þegar nemendur voru spurðir um heimanám í könnun sem var lögð fyrir rúmlega 100 manna handahófsúrtak á vorönn 2004 kom í ljós að 27% þeirra álitu sig verja minna en 2 klukkustundum í viku til heimanáms og 65% minna en 4 klukkustundum í viku. (Sjá mynd og töflu.)

Hvað verð þú að jafnaði löngum tíma til heimanáms í hverri viku? (svör í klst.)	Karlar	Konur	Fd 1986 og 1987	Fd. 1985 eða fyrr	Almenn braut	Stúdents- brautir	Iðn- brautir	Annað nám	Búin(n) með 30 e. eða minna eftir v04	Búin(n) með 31 til 60 e. eða minna eftir v04	Búin(n) með meira en 60 e. eftir v04	Allir
0	26%	0%	11%	16%	10%	7%	35%	8%	7%	7%	19%	13%
0 til 2	12%	17%	19%	9%	25%	14%	9%	8%	36%	15%	9%	14%
2 til 4	35%	41%	39%	38%	55%	34%	30%	42%	57%	37%	34%	38%
4 til 6	11%	15%	12%	14%	5%	17%	9%	17%	0%	15%	16%	13%
6 til 9	11%	15%	11%	14%	5%	14%	13%	17%	0%	15%	14%	12%
9 til 12	4%	7%	5%	5%	0%	9%	0%	8%	0%	7%	5%	5%
12 til 15	2%	4%	2%	4%	0%	3%	4%	0%	0%	2%	3%	3%
> 15	0%	2%	2%	0%	0%	2%	0%	0%	0%	2%	0%	1%

Þar sem spurt var hvort próf og matsaðferðir séu metnar eða skoðaðar með skipulegum hætti (t.d. með samanburði við aðra skóla) nefndu kennarar í íslenskudeild og stærðfræðideild að gagnlegt sé að funda með kennurum úr öðrum skóla (eins og gert hefur verið með kennurum í Fjölbrautaskóla Suðurlands og Fjölbrautaskóla Suðurnesja) og í samfélagsgreinadeild var talað um að endurvekja samstarf við aðra skóla. Þetta gefur tilefni til að efna oftar til sameiginlegra fagkennarafunda með skólunum á Selfossi og á Suðurnesjum.

5.  Varðandi kvartanir

Allar deildir eru sammála um að mjög lítið sé um að nemendur eða foreldrar kvarti undan störfum kennara.

6.  Annað

Hjá tungumálakennurum komu fram efasemdir um að rétt sé að nýnemar byrji samtímis í frönsku og þýsku. Þetta hafa nýnemar á málabraut gert og verður skoðað í samráði við deildarstjóra hvort breyta þurfi vali  áfanga á fyrstu önn fyrir þá.

Í raungreinadeild var talað um mikilvægi þess að efla tengsl skólans við háskóla- og rannsóknarstofnanir í fjórðungnum. Stjórnendur Fjölbrautaskóla Vesturlands hafa þegar fundað með rektorum Viðskiptaháskólans á Bifröst og Landbúnaðarháskólans á Hvanneyri og ákveðið er að funda aftur á næsta skólaári og leita leiða til að auka samvinnu þessara tveggja háskóla við framhaldsskóla í fjórðungnum (þ.e. Fjölbrautaskóla Vesturlands og Fjölbrautaskóla Snæfellinga). Einnig hafa stjórnendur Fjölbrautaskóla Vesturlands sett skólanum stefnu eða markmið til næstu ára þar sem kveðið er á um að tengsl skólans við fyrirtæki, stofnanir og mannlíf á svæðinu verði styrkt og aukin. Stefna þessi var mótuð í samráði við kennarahópinn og að undangengnum umræðum á kennarafundum.