Samskipta- og skólareglur

Samskipta- og skólareglur í Fjölbrautaskóla Vesturlands eiga það sameiginlegt að byggja á gagnkvæmri virðingu nemenda, kennara og annars starfsfólks. Auk þess er andi þeirra sá að hvetja til góðrar umgengni, tillitssemi og umburðarlyndis.
    Það er stefna Fjölbrautaskóla Vesturlands að stuðla að því að allir sem þar starfa, nemendur, kennarar og annað starfsfólk, umgangist hver annan af kurteisi og tillitssemi. Nemendur og aðrir sem leita eftir þjónustu skrifstofu, bókasafns, heimavistar og mötuneytis eiga að finna gott og vinsamlegt viðmót. Á sama hátt ætlast skólinn til þess að allir þeir sem leita eftir þjónustu geri það á kurteislegan hátt og sýni skilning og biðlund ef ekki er hægt að sinna erindum þeirra samstundis.
 

Skólareglur

1. Nemendur skulu sýna skólasystkinum sínum og starfsfólki skólans tillitssemi og kurteisi í daglegum samskiptum.
2. Komið skal vel fram við alla, nemendur og starfsmenn. Verði nemandi eða starfsmaður var við einelti eða tilraunir til eineltis ber viðkomandi að láta námsráðgjafa vita af því strax. Námsráðgjafar leitast við að vinna á einelti með samræðum við þá sem hlut eiga að málum.
3. Nemendur skulu stunda nám sitt samkvæmt kennsluáætlunum og fyrirmælum kennara og forðast allt sem veldur truflun í skólastarfinu.
4. Nemendum ber að ganga vel um húsnæði, tæki og annan búnað skólans.
5. Neysla áfengis og annarra vímuefna er bönnuð í skólanum og á samkomum og ferðalögum á hans vegum.
6. Reykingar og önnur tóbaksnotkun er bönnuð í skólanum.
7. Neysla matar, drykkja og sælgætis er bönnuð í kennslustofum.
8. Ítrekuð brot nemenda á skólareglum geta leitt til brottvísunar úr skóla að undangenginni viðvörun. Nemandi sem brýtur almenn hegningarlög í skólanum getur átt von á tafarlausri brottvísun úr skóla ef brotið er þess eðlis að viðvörun verður ekki við komið.
9. Þeir sem þiggja skólavist í Fjölbrautaskóla Vesturlands gangast með því undir þær reglur sem þar gilda.
      

Réttur kennara til að halda vinnufrið í kennslustundum

1. Kennari er verkstjóri í kennslustundum og stjórnar því sem þar fer fram. Það er réttur kennara og nemenda að vinnufriður ríki í kennslustundum.
2. Kennara er heimilt að færa í sundur einstaklinga sem trufla.
3. Kennara er heimilt að vísa nemanda úr kennslustund.
4. Kennara er heimilt að neita nemanda sem vísað hefur verið úr kennslustund um að sækja tíma í viðkomandi áfanga hafi nemandinn ekki gert hreint fyrir sínum dyrum.
5. Nemendur sem ítrekað trufla vinnufrið í kennslustundum geta átt yfir höfði sér brottvísun úr skóla.
      

Kvartanir nemenda

Ef nemandi telur sig ekki geta rætt beint við kennara sinn um atriði sem honum finnst að betur mættu fara, eða telur sig ekki hafa fengið viðeigandi lausn eftir að hafa rætt við kennarann, getur hann snúið sér til umsjónarkennara síns, deildarstjóra, námsráðgjafa eða stjórnenda. Nemandinn skal þá hafa eftirfarandi að leiðarljósi:

• Kvartanir sem varða tilhögun kennslu, yfirferð efnis eða námsmat (t.d. skortur á verkefnum, kennsluáætlun sem ekki er fylgt, ósanngjarnt próf) berist til deildarstjóra sem ræði þær við viðkomandi kennara. Ef ekki næst samkomulag má vísa málinu áfram til skólameistara. Þurfi nemandi að kvarta yfir deildarstjóra skal hann snúa sér til skólameistara.
• Aðrar kvartanir (sem varða t.d. framkomu kennara við nemendur) berist til námsráðgjafa. Deildarstjóri og námsráðgjafi ræði við viðkomandi kennara á formlegum fundi ef ástæða þykir til. Námsráðgjafi meti í samráði við deildarstjóra hvenær nóg er að gert og niðurstöður ásættanlegar fyrir alla aðila. Ef ágreiningur er um hvort niðurstöður eru ásættanlegar er málinu vísað til stjórnenda til frekari úrvinnslu.

Nemendur geta snúið sér beint til deildarstjóra, námsráðgjafa, eða stjórnenda með kvartanir. Þeir geta einnig rætt við umjónarkennara sína og fengið aðstoð þeirra. Námsráðgjafar og umsjónarkennarar eru hafðir með í ráðum við lausn ágreiningsmála sem varða skjólstæðinga þeirra.
    Rísi ágreiningur milli nemenda og kennara eða annarra starfsmanna skólans og takist hlutaðeigandi ekki að finna lausn á málinu skal því vísað til skólameistara. Uni málsaðilar ekki niðurstöðu skólameistara má vísa málinu til menntamálaráðuneytisins.
    Komi fram kvartanir eða kærur vegna samskipta nemanda/nemenda og skólameistara og takist ekki að leysa málið innan skólans skal því vísað til úrlausnar menntamálaráðuneytisins.
    Telji nemandi, eða forráðamenn hans sé nemandinn yngri en 18 ára, að brotið hafi verið á rétti nemandans, þannig að ástæða sé til að bera fram kvörtun skulu þeir snúa sér til skólameistara.
 

Um skólasókn

Nemendur skulu sækja allar kennslustundir samkvæmt stundatöflu sinni og koma stundvíslega til kennslu.

Eftirfarandi reglur gilda um skráningu fjarvista, viðurlög við þeim og einkunn fyrir skólasókn:

1. Ef nemandi er fjarverandi úr kennslustund (klukkustund) eða mætir eftir að fjórðungur kennslustundar er liðinn skrifar kennari F í kladda. Komi nemandi of seint en þó áður en fjórðungur kennslustundar er liðinn skrifar kennari S. Sambærilegar reglur gilda yfirgefi nemandi kennslustund áður en henni er lokið. Þrjú S jafngilda einu F.
2. Ef annað er ekki tekið sérstaklega fram í kennsluáætlun jafngildir það úrsögn úr áfanga ef fjarvistir í honum eru fleiri en sem svarar kennslu í eina og hálfa viku (t.d. meira en 6 skipti í áfanga sem er kenndur 4 sinnum í viku).
3. Veikindi og önnur forföll skal tilkynna samdægurs. Nemanda ber að tilkynna forföll áður en hringt er út úr fyrstu kennslustund sem hann skal, samkvæmt stundatöflu, sækja þann daginn. Tekið er við tilkynningum um forföll í síma. Sé nemandi yngri en 18 ára skulu forföll staðfest af forráðamanni. Skólameistari getur krafist þess að veikindi séu staðfest af lækni.
4. Ef nemandi gerir grein fyrir öllum veikindaforföllum í samræmi við 3. grein hér að ofan þá valda veikindi því ekki að hann fái lægri einkunn en 7 fyrir skólasókn. (Veikindi eru dregin frá upp að 93%.)
5. Einkunn er gefin fyrir skólasókn og birtist hún í námsferli nemenda og á útskriftarskírteini. Skólasóknareinkunn ræðst af skólasókn samkvæmt töflunni hér fyrir neðan. Nemandi í fullu námi (24 kennslustundum eða meira) sem nær 9 eða 10 í skólasóknareinkunn fær 1 einingu sem er færð inn í námsferil hans við lok annar.
      
   Frá 98% upp í 100% gefur einkunnina 10
   Frá 96% upp að 98% gefur einkunnina 9
   Frá 94% upp að 96% gefur einkunnina 8
   Frá 92% upp að 94% gefur einkunnina 7
   Frá 90% upp að 92% gefur einkunnina 6
   Frá 88% upp að 90% gefur einkunnina 5
   Frá 86% upp að 88% gefur einkunnina 4
   Frá 84% upp að 86% gefur einkunnina 3
   Frá 82% upp að 84% gefur einkunnina 2
   Skólasókn undir 82% gefur einkunnina 1
       
6. Sé skólasóknareinkunn lægri en 5 á nemandi ekki vísa skólavist á næstu önn.
   
      

Reglur um niðurfellingu fjarvista af öðrum ástæðum en veikindum

Skólaráð getur heimilað að fjarvistir séu felldar niður að fullu eða nokkru leyti þegar nemendur hafa verið fjarverandi í eftirfarandi tilvikum:

1. Vegna námsferða á vegum skólans (ferðir skipulagðar af NFFA samþykktar af skólastjórnendum falla hér undir).
2. Vegna tiltekinna starfa í stjórn NFFA að fengnu leyfi skólaráðs.
3. Vegna keppnisferða á vegum skólans eða NFFA.
4. Vegna vinnu við undirbúning og framkvæmd stórviðburða á vegum NFFA að undanfengnu leyfi skólaráðs.
5. Vegna þátttöku í, eða undirbúnings fyrir, íþróttakeppni á vegum landsliðs eða íþróttafélags, enda liggi fyrir staðfesting á slíkri þátttöku frá viðkomandi sérsambandi eða íþróttafélagi.
6. Vegna ófærðar eða annarra óviðráðanlegra tilvika, enda geti nemandi skýrt og staðfest þá töf sem hann varð fyrir.
7. Vegna útfarar nákomins ættingja eða vinar.
8. Vegna veikinda barns sem nemandi á eða hefur á framfæri.
9. Þegar rökstudd umsókn um leyfi vegna brýnna erinda liggur fyrir frá nemanda eða forráðamönnum hans.

   

Reglur um um frávik frá skólasóknarreglu

Nemendur geta sótt um frávik frá skólasóknarreglu í byrjun annar. Umsókn þarf að vera rökstudd. Um frá vik frá skólasóknarreglu gildir:

1. Nemendur sem hafa fengið samþykkt frávik frá skólasóknarreglu geta þurft að mæta í allar kennslustundir í sumum áföngum (einkum verklegum og próflausum) sem ekki er hægt að ljúka nema með reglulegri tímasókn.
2. Skólinn gerir þá kröfu að nemandi með frávik frá skólasóknarreglu geti sótt allveruleg-an hluta kennslustunda. Nemandinn á ekki rétt á kennslu eða leiðsögn utan kennslu-stunda umfram aðra nemendur.
3. Nemendur með frávik frá skólasóknarreglu geta ekki stundað nám í fornámsáföngum (með millitöluna 9).
4. Hafi nemandi fallið í einhverjum áföngum á síðustu önn sinni í skóla getur hann ekki fengið frávik frá skólasóknarreglu í fleiri einingum en hann lauk með fullnægjandi árangri á þeirri önn.
5. Að jafnaði skal við það miðað að nemandi sem fær frávik frá skólasóknarreglu sé orðinn a.m.k. 20 ára, hafi stundað nám með góðum árangri og tilgreini í umsókn sinni ástæður þess að hann geti ekki haldið áfram námi án þess að sleppa einhverjum kennslustundum.
6. Endurnýja þarf umsókn um frávik frá skólasóknarreglu í upphafi hverrar annar. Það gerir nemandi með því að fylla út eyðublað sem fæst á skrifstofu skólans. Umsóknin er afgreidd í samráði við deildarstjóra og kennara fyrir lok annarrar kennsluviku.
7. Þess er vænst að nemendur í fullu námi hafi samráð við skólastjórnendur eða náms-ráðgjafa áður en umsókn þeirra um frávik frá skólasóknarreglu er afgreidd.
8. Nemandi með frávik frá skólasóknarreglu fær hvorki skólasóknareinkunn né einingar fyrir skólasókn (en skráð er U í stað einkunnar í námsferil)

   

Skráning og meðferð upplýsinga

Skólinn skráir námsferla nemenda, námsárangur, viðveru og fleiri upplýsingar sem varða skólagöngu þeirra með rafrænum hætti í gagnagrunn (Innu) sem kennarar, námsráðgjafar og skólastjórnendur hafa aðgang að.
   Starfsmenn skólans sem hafa lykilorð að rafrænum upplýsingum um nemendur skulu gæta þess að engir aðrir fái vitneskju um lykilorðið og láta skólastjórnendur vita tafarlaust ef þeir hafa grun um að gögn sem meðhöndla ber sem trúnaðarmál séu aðgengileg óviðkomandi.
   Starfsfólk skólans sem aðgang hefur að gögnum um nemendur er bundið trúnaði og óheimilt er að veita persónulegar upplýsingar um nemanda án samþykkis þess sem í hlut á og forráðamanna ef um er að ræða nemanda yngri en 18 ára.
  

Aðgangur nemenda og forráðamanna þeirra að upplýsingum

Hver nemandi fær lykilorð sem veitir honum aðgang að rafrænum upplýsingum sem skráðar eru um hann sjálfan. Sé nemandi yngri en 18 ára geta forráðamenn hans einnig fengið lykilorð sem veitir aðgang að sömu upplýsingum. Forráðamenn geta enn fremur fengið upplýsingar um námsframvindu, skólasókn eða annað sem tengist barni þeirra sérstaklega með því að hafa samband við skólastjórnendur.
   Þegar nemandi hefur náð sjálfræðisaldri er einungis heimilt að veita honum sjálfum, eða þeim sem nemandinn veitir skriflegt umboð, upplýsingar um mál er varða hann persónulega.