Reglur um frjálsa tímasókn

Í skólanámskrá sem liggur frammi á vef skólans vantar reglur um frjálsa mætingu. Á deildarstjórafundi 14. nóvember 2003 var ákveðið að reglurnar yrðu sem hér segir. Þær öðlast gildi við upphaf vorannar 2004 og verða birtar í fjórðu útgáfu skólanámskrár sem kemur á vefinn á næsta ári.

Frjáls tímasókn felur í sér undanþágu frá almennum skólasóknarreglum.

• Nemendur sem hafa fengið frjálsa tímasókn geta þurft að mæta í allar kennslustundir í sumum áföngum (einkum verklegum og próflausum) sem ekki er hægt að ljúka nema með reglulegri tímasókn.
• Nemendur með frjálsa tímasókn geta ekki stundað nám í fornámsáföngum (með millitöluna 9).
• Þurfi nemandi sem sækir um frjálsa tímasókn að ljúka hægferðaráfanga (í DAN, ENS, ÍSL, STÆ) skal honum vísað á fjarnám þar sem því verður við komið.
• Hafi nemandi fallið í einhverjum áföngum á síðustu önn sinni í skóla getur hann ekki fengið frjálsa tímasókn í fleiri einingum en hann lauk með fullnægjandi árangri á þeirri önn.
• Nemandi með frjálsa tímasókn fær hvorki skólasóknareinkunn né einingar fyrir skólasókn.
• Að jafnaði skal við það miðað að nemandi sem fær frjálsa tímasókn sé orðinn a.m.k. 20 ára, hafi stundað nám með góðum árangri og tilgreini í umsókn sinni ástæður þess að hann geti ekki haldið áfram námi án þess að fá undanþágu frá skólasóknarreglum.

Skólinn gerir þá kröfu að nemandi með frjálsa tímasókn geti sótt allverulegan hluta kennslustunda, þótt óreglulega sé. Þessi tímasókn á að nægja til að nemandinn geti fylgst með og tekið þátt í kennslunni. Nemandinn á ekki rétt á kennslu eða leiðsögn utan kennslustunda umfram aðra nemendur.
Endurnýja þarf heimild til frjálsrar tímasóknar í upphafi hverrar annar. Það gerir nemandi með því að fylla út þar til gert eyðublað sem fæst á skrifstofu skólans. Umsóknin verður afgreidd í samráði við deildarstjóra og kennara fyrir lok annarrar kennsluviku.