Annáll vorannar 2003 við Fjölbrautaskóla Vesturlands
Kennsla á vorönn hófst þann 8. janúar. Í upphafi annar voru nemendur rúmlega 560 þar af 20 nýnemar og eru þá ekki taldir þeir sem höfðu verið í skólanum áður og komu inn eftir hlé. Þetta er svipaður fjöldi og undanfarin ár. Fyrir flesta nemendur lauk skólastarfi á vorönn 20. maí þegar þeir fengu einkunnir sínar afhentar. Önninni lýkur þó með formlegum hætti nú í dag þegar 49 nemendur útskrifast frá skólanum, þar af tveir skiptinemar.
Meðal þess sem bar til tíðinda í upphafi annar var að hluti af tækjakosti tréiðnadeildar skólans var endurnýjaður, en ýmsar stærri vélar í húsi deildarinnar við Vesturgötu voru keyptar fyrir Iðnskólann á Akranesi meðan hann var og hét fyrir meira en aldarfjórðungi og því orðnar gamlar og lúnar.
Undanfarin ár höfum við sem hér störfum haft nokkrar áhyggjur af minnkandi aðsókn nemenda að raf-, tré- og málmiðnagreinum. Í vetur var okkur nauðugur einn kostur að fella niður kennslu á öðru ári í rafeindavirkjun og á þriðja ári í vélvirkjun. En nú hefur aðsókn að þessum námsbrautum aukist og stefnir í að hægt verði að bjóða fulla kennslu á öllum iðnbrautum skólans næsta vetur.
Þann 5. mars heimsóttu Tómas Ingi Olrich menntamálaráðherra og Gísli Gíslason bæjarstjóri á Akranesi skólann og undirrituðu samning um byggingu nýs kennsluhúsnæðis. Ráðgert er að hönnun nýbyggingarinnar ljúki á þessu ári og smíði hennar hefjist í byrjun árs 2004. Hin nýja bygging mun tengjast eldri húsum skólans Vallholtsmegin á skólalóðinni. Jafnframt nýbyggingunni verður kennsluhúsnæði á efri hæð gamla skólans endurnýjað (þ.e. stofur C201 til C205). Með þessum framkvæmdum verður kennslurými aukið og aðstaða til kennslu í raungreinum bætt verulega þar sem innréttaðar verða rúmgóðar sérstofur til verklegrar kennslu. Timburhúsin við Vallholt munu hverfa af lóðinni og þar sem þau eru verða sett bílastæði. Þegar þessum framkvæmdum verður lokið má heita að kennsluhúsnæði skólans sé fullbyggt nema hvað enn mun vanta rúm fyrir tréiðnadeildina sem er í gömlu og fremur lélegu húsnæði við Vesturgötu.
Þróun upplýsingatækni við skólann heldur áfram á fullum hraða. Anna Margrét Sveinsdóttir kerfisstjóri vinnur um þessar mundir að uppsetningu nýs hugbúnaðar á netþjónum skólans. Fartölvuvæðing heldur áfram og nú hafa 28 kennarar fartölvu í eigu skólans til ráðstöfunar. Í janúar var lagður ljósleiðari inn í skólann og staðarnet hans tengt svokölluðu FS-neti. Þetta net tengir alla framhaldsskóla og símenntunarmiðstöðvar á landinu saman og sér þeim fyrir aðgangi að Interneti og ýmissi þjónustu. Bandvídd þess er 100 Mb/sek. Upplýsingakerfi framhaldsskólanna, Inna, er orðið aðgengilegt nemendum hvar sem þeir komast í samband við Internetið. Hver nemandi getur því skoðað allar upplýsingar sem um hann eru skráðar, t.d. námsferil, einkunnir og fjarvistir. Sé nemandi undir 18 ára aldri er forráðamönnum hans heimilt að lesa sömu gögn af netinu.
Hver önn í framhaldsskóla er 18 vikur. Yfirleitt eru vikurnar fram að prófum hver annarri líkar og fylgja sömu stundaskrá. Um miðja önn er þó vani að slá á léttari strengi í tvo til þrjá daga. Á hausönn er skammhlaup í einn dag og miðannarfrí í einn eða tvo. Á vorönn eru opnir dagar. Að þessu sinni voru þeir 26., 27. og 28. febrúar. Þá gafst nemendum kostur á að taka námskeið í ýmsum greinum og fara í náms og kynnisferðir. Af öðru sem gert var til upplyftingar bar hæst sýningar leiklistarklúbbs nemendafélagsins sem flutti söngleikinn Hárið. Leikstjóri var Jón Páll Eyjólfsson og framkvæmdastjóri sýningarinnar var Guðmundína Arndís Haraldsdóttir. Um það bil 50 nemendur komu fram í sýningunni sem var vel heppnuð og skemmtileg í alla staði.
Hin árlega stærðfræðikeppni fyrir nemendur í áttundu, níundu og tíundu bekkjum grunnskóla var haldin 26. febrúar. Keppnin var, eins og endranær, haldin samtímis við framhaldsskóla víða um land. Þetta er í fimmta sinn sem unglingum af Vesturlandi gefst kostur á að taka þátt í henni. Alls mættu 204 unglingar til keppni hér í Fjölbrautaskólanum og hafa aldrei verið fleiri. Það voru stærðfræðikennarar skólans undir forystu Bjarnþórs Kolbeins sem stjórnuðu keppnishaldinu og sáu um að meta úrlausnir.
Eins og undanfarnar annir hafði skólinn töluverð samskipti við menntastofnanir í öðrum löndum. Í febrúar fóru 7 nemendur af íþróttabraut í heimsókn til framhaldsskóla í Asiaat á Vestur-Grænlandi og dvöldu þar í tæpar tvær vikur og lærðu meðal annars að aka hundasleða. Í mars fóru 8 nemendur til Muurame í Finnlandi og endurguldu þannig heimsókn nemenda þaðan á síðasta ári. Í mars og apríl heimsóttu 7 kennarar og 12 nemendur úr tré- og rafiðnadeildum skóla í Svíþjóð og Finnlandi. Í febrúar fór stærðfræðikennari til Brussel vegna verkefnis sem hann vinnur ásamt ítölskum kennara og belgískum kennara. Í júní fara 4 kennarar til Napolí vegna vinnu við verkefni sem fjallar um konur í goðsögnum og þjóðsögum.
Nokkrir gestir komu hingað m.a. nemendur og kennarar frá Finnlandi. Kennararnir dvöldu í viku en nemendurnir í mánuð. Þeir bjuggu á heimavist skólans og sóttu starfsþjálfun hjá fyrirtækjum á Akranesi og í nágrenni. Því alþjóðasamstarfi sem hér hefur verið tíundað var stjórnað af Hörpu Hreinsdóttur. Hún hefur nú látið af störfum sem tengiliður okkar við stofnanir í öðrum löndum og væntanlega verður nýr maður ráðinn í hennar stað í sumar.
Í mars heimsótti Gerhard Sabathil sendiherra Evrópusambandsins fyrir Noreg og Ísland skólann ásamt Anju Ek, sem sinnir málefnum Íslands í sendiráði Evrópusambandsins í Osló. Kristján E. Guðmundsson félagsfræðikennari átti frumkvæði að því að bjóða sendiherranum að koma í skólann og flytja erindi.
Enn um alþjóðlegt samstarf: Dagana 23. maí til 27. maí fóru 39 stafsmenn Fjölbrautaskólans í ferð til Skotlands. Þessi ferð er ástæða þess að skólaslit eru óvenju seint í ár. Hápunktur ferðarinnar var heimsókn í Elmwood College sem er skammt frá St. Andrews í Fife. Þar undirrituðu Hörður Ó. Helgason skólameistari Fjölbrautaskóla Vesturlands og Christina Potter skólameistari Elmwood College yfirlýsingu um samstarf skólanna. Samstarfið tekur til kennslu í umhirðu golfvalla og annarra grasvalla s.s. knattspyrnuvalla en Elmwood College er einn af fremstu skólum í heimi á því sviði. Fjölbrautaskóli Vesturlands mun hefja kennslu í grasvallafræðum haustið 2003 í samstarfi við Garðyrkjuskóla Ríkisins og Símenntunarmiðstöð Vesturlands. Samstarfsyfirlýsing skólanna kveður meðal annars á um að kennslan hér uppfylli allar faglegar kröfur sem gerðar eru við Elmwood College og að Elmwood verði okkur til ráðuneytis og meti að fullu áfanga sem við kennum svo nemendur sem ljúka námi í grasvallarfræðum hér geti farið beint í framhaldsnám þar. Hannes Þorsteinsson líffræðikennari hefur séð um undirbúning þessa samstarfs og skipulagsvinnu í tengslum við stofnun námsbrautar fyrir umsjónarmenn grasvalla.
Vart verður skilið við utanríkismál þessa skóla án þess getið sé um skiptinema. Á þessu skólaári voru þeir tveir, stúlka frá Kína og önnur frá Tælandi og munu þær útskrifast hér á eftir. Eins og fyrr hefur Gyða Bentsdóttir verið skiptinemum til halds og trausts og hjálpað þeim að aðlagast skólastarfi hér.
Síðan 1992 hefur fyrirtækið Rannsóknir og greining ehf. kannað vímuefnaneyslu íslenskra ungmenna. Fyrir skömmu kom út skýrsla um vímuefnaneyslu nemenda í tíundu bekkjum á Akranesi sem fyrirtækið vann fyrir Akraneskaupstað. Samkvæmt skýrslunni var neysla vímu- og fíkniefna meðal tíundubekkinga á Akranesi talsvert yfir landsmeðaltali árið 2000. Síðan hefur ástand mála hér í bæ skánað að mun og neyslan minnkað. Árið 2002 var hún vel undir landsmeðaltali og þó hafði ástandið skánað til muna á landsvísu. Þessa breytingu sem orðin er til batnaðar má trúlega að nokkru rekja til þess að fleiri og fleiri foreldrar gera sér ljóst að fíkniefnaneysla barna er með öllu óásættanleg hvort sem um er að ræða áfengi og tóbak sem fullorðnum er heimilt að neyta eða önnur efni sem eru með öllu bönnuð. Enn er þó alltof mikið um að ungt fólk spilli heilsu sinni með neyslu vímu- og fíkniefna. Fjölbrautaskólinn mun því áfram leggja áherslu á forvarnir og samstarf við Jafningjafræðsluna og aðra sem styðja unglinga í að njóta þess besta sem lífið hefur upp á að bjóða. Mér er sérstök ánægja að segja frá því að þegar Áfengis- og vímuvarnaráð úthlutaði styrkjum úr Forvarnasjóði nú í maí fékk Jafningjafræðslan hér við Fjölbrautaskólann framlag til að kosta fyrirlestra, fræðslu og listviðburði á næsta skólaári.
Aðrar fréttir, ekki jafn ánægjulegar, eru að þegar skólasóknareinkunnir voru reiknaðar fyrir vorönn 2003 kom í ljós að skólasókn var nokkru lakari en verið hefur undanfarin ár. Þessi óheillaþróun veldur skólastjórnendum töluverðum áhyggjum og til að sporna gegn henni hefur verið ákveðið að herða reglur um viðbrögð skólans við fjarvistum nemenda. Nýjar reglur um þetta efni verða kynntar í upphafi haustannar 2003.
Læt ég nú lokið annál vorannar 2003 og óska útskriftarnemum til hamingju með þann áfanga sem þeir hafa náð um leið og ég hvet þá til að halda áfram að afla sér menntunar og þroska.Atli Harðarson